கனடாவின் ஆயிரம் தீவுகள் - புகைப்பட பயண குறிப்புகள்

கனடாவின் பெரும் நதியான செயின்ட்.லாரன்ஸ்,பிரம்மாண்டமான ஒண்டாரியோ(Lake Ontario)ஏரியில் கலக்கும் இடத்தில் இருக்கிறது ஆயிரம் தீவுகள்(Thousand Islands).ஆயிரம் தீவுகள் என்று சொல்லப்பட்டாலும் உண்மையில் 1793 சிறிய மற்றும் பெரிய தீவுகளை கொண்டது.சிறிய தீவுகள் என்றால் ஒரு மரம் மற்றும் ஒரு வீடு கொண்ட தீவுகள் முதல் 100 சதுர கிலோமீட்டர் பரப்பளவு கொண்ட பெரிய தீவுகள் வரை உள்ளன.

சிறந்த விடுமுறை வாசஸ்தலமாக உள்ள ஆயிரம் தீவுகள்,நன்னீர் படகு சவாரி செய்ய உலகின் சிறந்த இடமாக கருதப்படுகிறது.விடுமுறையை அமைதியாக,இயற்கையோடு ஒன்றி கழிக்க பெரும்பாலான தீவுகள் விலைக்கு வாங்கப்பட்டு வீடுகள்,மாளிகைகள் கட்டப்பட்டுள்ளன.இந்த ஆயிரம் தீவுகளில் முக்கியமான மற்றும் புகழ் பெற்ற தீவுகள், இடங்களை படகில் சவாரி செய்து பார்த்தோம்.(படங்களை பெரிதாக்க மேலே சொடுக்கவும்).


இது போல்ட் கேசில்(Boldt Castle)எனப்படும் கோட்டை.ஜார்ஜ் போல்ட்(George Boldt)என்ற பெரும் பணக்காரர் தன் காதல் மனைவிக்காக 1900 களில் கட்டிய இந்த கோட்டை,1904 இல் அவர் மனைவி இறந்துவிடவே கட்டிட வேலை அப்படியே நின்று போனது.பின்னர் அரசின் மேற்பார்வையில் தனியார் அமைப்பு பல ஆண்டுகள் கழித்து புதுப்பித்து பார்வையாளர்களுக்கு திறந்து விட்டது.பிரம்மாண்டமான இந்த மாளிகையில் நூலகம்,நீச்சல் குளம் என சகல வசதிகளும் உள்ளன.போல்ட் தன் காதல் மனைவிக்காக கட்டிய கோட்டை அமைந்துள்ள இந்த தீவு இதய வடிவில் அமைந்துள்ளது இன்னும் சிறப்பு.இந்த தீவிற்கு பெயரே ஹார்ட் ஐலன்ட்(Heart Island).



போல்ட் கோட்டைக்கு மின்சாரம் வழங்க இந்த சிறிய கோட்டை Generator வசதியுடன் உள்ளது.

ஹார்ட் ஐலண்டை Aerial View இல் பார்க்க புகழ் பெற்ற இந்த படத்தை இணைத்துள்ளேன்.

இந்த வேடிக்கையை பாருங்கள்.இந்த சிறிய பாலம்,உலகின் மிக சிறிய சர்வதேச பாலம் என அழைக்கப்படுகிறது.இடது புறம் உள்ள தீவு அமெரிக்காவை சேர்ந்தது.வலது புறம் உள்ள சிறிய தீவு கனடாவை சேர்ந்தது.இரண்டு நாடுகளையும் இணைக்கிறது இந்த சிறிய பாலம்.